Skrifstofuglugginn minn

Ég hef verið að vinna í litlu skrifstofunni minni undanfarna viku eða á meðan ég hef verið að leika hjúkrunarfræðing hér heima með alla veikindapésana mína ( ég er eiginlega alveg hissa á því að ég hef ekki sjálf orðið veik ).  Gluggakistan er orðin voðalega sæt, Skrifborðið komið á sinn stað og prentarinn kominn nær tölvunni.  Ég fékk þetta flotta saumaborð frá ömmu minni heitinni og það er komið á góðan stað og þið fáið að sjá mynd af þessu öllu saman þegar ég er búin að klára að laga til i hillunni.  En hér koma nokkrar myndir af gluggakistunni minni.

Limmðann í gluggann fékk ég í Tiger fyrir löngu.  Húsin eru kertabakki sem ég fékk um daginn í hagkaup, uglurnar eru héðan og þaðan og sveppirnir úr söstrenes grene.  Krosskrukkan er kertakrukka með fallegum poka utan um sem við fengum þegar Stelpurnar okkar dóu.

Svo eru hér 2 eftir að sólin fór niður.

Knús i hús eða krús

Koma áreiðanlega inn myndir þegar skrifstofan er orðin tilbúin.  Allavegana fyrir jól, fyst ætla ég að klára prófin í skólanum.

Barnaafmæli Kára Steins

Kári Steinn fékk að bjóða nokkrum krökkum í afmælisveislu og honum þótti það svakalega spennandi.  Eftir miklar vangaveltur var ákveðið að hafa þetta einfalt og bjóða bara krökkunum í húsinu og þetta urðu 9 krakka allt í allt, með Víkingi og Kára.  Einfaldasta barnaafmæli sem við höfum haldið fyrir utan þegar Víkingur bauð í ævintýragarðinn í kringlunni ( en þá var ég ekki heima ).  Engir foreldrar og ekkert vesen, ég komst upp með að baka eingöngu 2 kökur og muffins og ekkert stress hehe.

Ég var mikið búin að velta þvi fyrir mér hvernig ég gæti skreytt borðið og var komin á það að hafa svartan dúk ( sést minnst á honum ef eitthvað fer niður ), svo áttum við nokkra rauða diska frá þvi í fjölskylduafmælinu sem ég notaði og servéttur.  Áætlunin var að reyna að hafa þetta sem einfaldast og ódýrast. ( Nokkrum dögum eftir afmælið fann ég cars diska, glös og servéttur í kronunni i kópavogi en ég var búin að leita lengi að þessu ).  Notaði svo bara plastglösin sem strákarnir nota hversdags og svo áttu þeir 1 cars disk og 1 spidermandisk sem við notuðum líka þvi það voru ekki til nógu margir rauðir diskar.  Rétt áður en ég fór að leggja á borðið ákvað ég að kíkja upp í skáp og ath hvort það leyndist einhver fjarsjóður þar.  Juju, kaupgleðin mín borgar sig stundum hahaha.  Ég hafði einhvern tímann keypt rauðan dúk og hann gat ég notað og svo átti ég smá bút eftir af þessum bláa borða sem er þarna í miðjunni.  Siðan fann ég nokkra upphleypta carslimmiða sem ég setti á tannstöngla og stakk í bollakökurnar og svo bara allir carsbílar strákana settir á borðið.  Kári afmælisbarn var alveg hæstánægður með þetta og krökkunum þótti þetta mjög flott.

Jú svo fann ég líka þennan borða uppi í skáp :)

Afmæliskakan, ég varð mun sáttari við þessa en i hinu afmælinu

Magnoliubollakökurnar með límmuðunum

Blásið á kökuna

Víkingur fetar í fótspor langafa Benna, afa Eyda og pabba síns og stóð upp og hélt ræðu

Og Kári Steinn þakkaði kærlega fyrir sig :)

Smakkkaka

Ég fékk ótrúlega spennandi tilboð og tækifæri um daginn.  Samstarfskona hans Kidda er að fara að gifta sig og bað mig um að íhuga hvort ég gæti bakað brúðkaupstertuna :)  Þvílíkur heiður að vera beðin um þetta og um leið kom þessi hnútur í magann  - hvort ég gæti það, er ég nógu góð og get ég bakað nógu góða köku.  Alveg ótrúlegt hvað óöryggið er fljótt að koma upp.  En ég ákvað að slá til og gefa þeim smakkköku og í gær komu þau.

  Ég gerði 2 kökur.  Báðar súkkulaðikökur eins og þau voru búin að biðja um.  Önnur kakan var með jarðaberjafrómasi en hin með jarðaberjum og smjörkremi.

Þessi gutti beið bara í "bátnum sinum " meðan ég setti saman kökurnar.

Um daginn var hann svo heppinn að fá að sleikja sítrónurjóma af sleifinni eftir að ein terta var tilbúin.

Afmæliskakan hennar Lindu systur

Linda systir var 50 ára 6. apríl síðastliðinn.  Hún var búin að biðja mig um að baka fyrir sig köku til að hafa í kaffiboði á sunnudeginum ( hún átti afmæli á laugardeginum ), svona til að hafa ef einhver skyldi kíkja í heimsókn.  Það sem hún vissi ekki var að það var búið að undirbúa óvænta afmælisveislu fyrir hana á laugardagskvöldinu.  Kvöldið heppnaðist stórvel, afmælisbarnið vissi ekkert af þessu og fékk konunglega móttöku af ölllum veislugestunum þegar hún kom á staðinn í sjúkrabílnum hehe.

Sykurmassann og alla litina og plastfiðrildin fékk ég í allt i köku í ármúlanum

Þetta er súkkulaðikaka með smjörkremi með jarðaberjabragði og svo jarðaberjafrómasi á milli laga.

 Kveðja og knús Prjónarós með meiru

Páskaborðið 2013

Ég var næstum því búin að gleyma að skreyta fyrir páskana !!!  Tvær ástæður fyrir því, heilmikil veikindi hafa herjað á fjölskylduna mína og ég sjálf legið í 3 daga í rúminu með háan hita en við erum öll að verða hressari. Hin ástæðan er að páskaskrautið var niðri í geymslu oooooooooooooooooooooooogggg ég var ekki alveg að finna lyklana að henni og svo er hún svo stútfull að ég var ekki viss um að ég myndi finna það i snarheitum en það tókst :)

Við fengum góða gesti í heimsókn , þau Benna bróður minn og Önnu Maríu móðursystur mína.  Kiddi eldaði æðislegan hamborgarhrygg ( sem var í boði mömmu minnar sem sólar sig þessa stundina ) og ég hafði búið til æðislegan ís til að hafa i desert í gær.

Hér sjáið þið flott hrygginn 

Þar sem það eru nú bara páskar 1 sinni á ári þá var mávastellið dregið fram til að hafa páskaborðið enn hátiðlegra.

En við Kiddi fengum matarstellið þegar við giftum okkur fyrir bráðum 11 árum frá ömmu minni og afa.

Strákarnir sömdu og sýndu örleikrit um 3 endur sem synda á tjörninni ( reyndar voru þær bara 2 sem syntu um á tjörninni því sú 3ja var dáin að sögn höfundarins hans Víkings Atla ).

Ég fékk 4 svona kaninur úr dánabúi ömmu og afa, nokkuð gamlar og svooooo krúttlegar

Að lokum góði daim ísinn minn, þarf að eignast betra ísform.  Set inn uppskriftina á morgun.

Knús í krús og svo gott að vera komin aftur eftir að hafa verið í burtu ( tölvulaus ) i svona langan tíma.

Skrautið undir kúplinum...........

...........  Kúpulinn góði sem ég fékk ódýrt í rúmfatalagernum ( já það leynist ýmisslegt þar í þeirri búð )  er mjög óþolinmóður við skrautið sem hann fær að geyma.  Um jólin fann ég spegil sem passaði akkúrat í botninn á bakkanum sem er undir kúplinum.   Hann passaði svona ljómandi fínt og hreindýrið mitt sæta sem ég keypti á jólaskreytingakvöldi hjá Blómaval leið svona líka vel þarna undir glerinu.  Því miður náðist ekki að taka mynd af þessari fallegu skreytingu.  Hinsvegar náði ég að taka myndir af skreytingunum sem tóku við jólaskreytingunum.  Þrátt fyrir að jólin væru búin þá fengu könglarnir að vera aðeins lengur.